طبعا الموضوع بس للبنات يعني انت يا ولد بره من غير مطرود
وانتوا يا لبنات جايب لكم احلى طرق علشان تطفشوا اخوانكم من البيت
بس اذا انضربتوا انا مالي دخل
***عند التلفزيون***
لا صارت فيه مباراه , والأخ متحمـــس أقطعي هالحماس,, كيـــف ؟!!
انـــا أقولك
شوفي إذا صار مبقق عيونه على الأخر كنها فناجين وماهو لم أحد يعني لو تجبين صاروخ وتفجرينه قدامه ماألتفت لك أعرفي أنه منسجم,
هنـــــــا ... بس قومي بشغلك...
أنقزي وجيبي قطعه قماش وبخاخ للتنظيف وأوقفي عند التلفزيون وأمسحي الشاشه ولا تعطينه فرصه يشوف زين,,
ولا قال أبعدي . قولي منيب فاضيتلك بنظف وامسح ,
وبعدين روحي جيبي مكنــــسه وأقعدي إكنسي وامرحي واسرحي في الغرفه أزعجيه يعني حاولي ماتكنسين إلا في المكان إلي هو قاعد عليه وحاولي للحظه أكنسي عند التلفزيون وغطي عليه.. ولا يهمك أحد..
وإذا قال : ابعدي لاأصفقك بالكاس قولي معليش ياوخيي بيجونا ضيوف.. العبي عليه ,, وإلا سوي نفسك جالسه وتذكرتي أن الكيك إلي بالفرن أحترق ناقزي إلين ماتوصلين للفيش وأمصعيه برجولك ولا تلتفتين وراك..
+++++++++++++++++++
***عنــــد النوم***
لا صار الشاب يشوخر.. نكدي عليه نومه كيــف؟! دخلي عليه بزارينكم وبزارين جيرانكم وصكي الباب وخليهم يلعبون ويأخذون راحتهم ووصيهم لايطامرون إلا عند رأسه .. تعرفين بعد الأطفال أحباب الله خخخخخخ
وإلا تعالي وهو في سابع نومه وأرجفيه ذيك الرجفه خلي عيونه تتحرول من الروعه وإذا قال وشو وشفيه؟؟ قولي لا بس بنروح..
++++++++++++++++++++
*** إذا المزاج صفر***
إذا شفتيه ماله خلق ومو رايق ومقفله معاه لأ تخافين بالعكس هذي فرصتك تنتقمين منه
بس أنتبهي في هاللحظه راقبي حركات يده لا يصمعك شي و وإلا يفلق رويسك بأي شي قدامه.. جهزي مفتاح غرفتك
وتشهدي .. لأن ماتدرين وش السالفه ياغالب يا مغلوب..
المهم .. اضحكي على شكله وعلى شكل جلسته وإلا على لبسه ,, وهو بقول تراني منيب رايق لك أذلفي عن وجهي ,,
أنتي عاد لا تسكتين قوليله وإذا ما ذلفت وش بتسوي
عاد هو بيقوم عليك بيوريك وش بيسوي على سنع أنتي في هالوقت لا يشوف إلا غبارك أقضبي أول درجتين على غرفتك وترا ياوخيتي النحشه نص الشجاعه لا يهمك بس.. وطلي عليه من فوق وضحكي وقولي قومتك هههههاي
عادي عادي وشفيها لا صرتي بزر تمتعي بطفولتك قبل عش الزوجيه
واهم شي تحقيق الغايه اللي(( تفجير الامبير))
++++++++++++++++++++++++
*** وقت المطاطقه***
هذي وانا أختك أهم مرحله في حملتنا ضدالشباب وأخطر مرحله
إذا جاء براسك حرش ودك تتطاقين أنتي والشاب لازم تجهزين نفسك من كل ناحيه:
1/ اللبـــس : لازم تلبسين ترنق علشان يسهل الركض
2/ الشوشه : لازم تلميها وسوي فيها حفله حطي أنواع الشبصات والبكلات إلي عندك وانتبهي ولا خصله تنزل منك
وياليت في ذاك اليوم تحطين حنا علشان ما يتجرأ ويلمس شعرك
3/مفتاح الغرفه : ولميه علشان الأحتياط
إذا بدت المعركه الشرسه حطي راسك براسه لا تبينين إنك خايفه وبققي عيونك فيه
وقولي وش في راسك عاد هو بيقولك هذا إلي في راسي طرااااااخ وبيصكك ذاك المخمس مصفي طبلونه..
لا تستسلمين (أعرف أن وجهك مال بس تمالكين نفسك) عطيه ذا البقوس إلي مصارينه تتلخبط مع أمعائه
وعلى طول لغرفتك الي انتي مجهزه مفتاحها من قبل وإقفلي عليك.. ويادار مادخلك شر بس نصيحه أقعدي في غرفتك يومين لا يشوفك ولا تشوفيه لأنه يبي ينتقم لكرامته ويوريك النجوم بعز القايله
باااااااااااااااااااااااااااايووووووووووووو
منقول
بنااات بصراااحه انا هذي طريقتي اذا كنت طفشااانه يعني يا نطفش سوااا او نضحك سواااا
عندي واااحد بالبيت احب اتهاااااوش معه وهو ما يقصر بس ماتوصل للكفوف
مره اخذت كوب ماء ومريت من عنده وسويت نفسي مانتبهت وكبيته على ملابسه
مسكني يبي يوديني للحديقه ويغرقني بالهوز المويه كان معصب وبعد محاااولات هربت وعلى غرفتي وماطلعت الا بعد مارااح ولما جاء نسى الموضوع وقاعد يضحك على شكلي لما هربت
كيف ترفعي ضغط اخوك الشاب (للبنات وبس)
