أكتب الفصــل الأول من معـــانـــي غــلاكـ
ودي أكتــب معـكـ قصــة غــلاكـ الأخيـــره
أذكــركـ قلت لــي مالــي غـلا إلا غــلاكـ
وآثـر سيـرتكـ بالأحــلام والحب سيــره
فلنبدأ أمسيتنا مع( شـــاعرآل سعـــود) كما يحب أن يلقب ... الرااائـــع دائماً السامر
الأمير الشاعر (عبدالعزيز بن سعود بن محمد آل سعود).....
(ربيع قلبـــي)
كـلٍ يقـول الزيـن كلـه بخلـي
أكيد ما شافوا مـن الزيـن حاجـه
ما شافوا اللي رمش عينه مظلـي
قلبي تكسر منـه كسـر الزجاجـه
خـلٍ ذبحنـي بالغـلا والتغـلـي
ربيـع قلبـي شوفتـه وابتهاجـه
هو روح روحي هو بعد كل من لي
لا شافني زعلان يضحك حجاجـه
ويفـز لـي فـزة محـبٍ يهلـي
هو طب جرحٍ ما عرفتوا علاجـه
وليشاف غيري صد كله رضاً لـي
حتى نظر عينه عن النـاس عاجـه
ما غير أناظـر بالخلايـق تسلـي
والله علم عن خافقي وش مزاجـه
أوادعـه ودمـوع عينـه تهـلـي
ما باعني قلبـه بموسـم خراجـه
(قلبي الجبـــار)
أنسني قلبي الجبار صـد ونسـى
ما جرى له بحبك وانشغل بالجديد
راح وقتٍ أردد به ياليت وعسـى
جعل هاك الليالي بيننا مـا تعيـد
لا تحاول لمن هو صد عنك وقسى
خالي الود مثلك ودك إنـه بعيـد
يا هلا بالهموم ويا هـلا بالأسـى
يومها حققت لي كل ما كنت أريد
يحسبني أفكر فيه صبـح ومسـا
ما درى قلبي الشفاف عود حديـد
مركبي في مراسيه الجديدة رسى
وبالغرام اهتنينـا والمحبـة تزيـد
(فهد الأمجــاد)
من كادنا في دين الاسـلام مـا كـاد
معروف وإلا طـول الأيـام مجهـول
الله نصر فهد العرب فخـر الأمجـاد
نصر ٍ مـن الخـلاق للديـن مامـول
ربٍ رفع سبـع ٍ بـلا سمـك وعمـاد
ومنجي نبي ٍ في حشا الحوت منقـول
فضح جرايمهم علـى روس الأشهـاد
وكشف خفاها بيـن سائـل ومسئـول
جرايم ٍ ما يكشـف احداثهـا ارصـاد
مدفونةٍ دفـن ٍ علـى الكيـد مفتـول
لكن بفضل اللـي لـه الخلـق عبـاد
وفـق حكومتنـا قبـل دايـر الحـول
وفق ملوك العدل فـي شعـب وبـلاد
وجاب الأمن روس الجريمه على طول
منكر حدود الشـرع والملـح والـزاد
مفسد وأثر له علـى ناقـص عقـول
قصـده يدمـر ديـن بالمعتقـد سـاد
موقد فتيل الشر فـي دار مـا هـول
قصده يحاول هـزة شمـوخ الأوتـاد
وتدمير دار الدين مـا هـوب معقـول
روس الكفر والشرك في أمة الضـاد
باب الخطا منهم على الديـن مقفـول
من شذ وإلا عن طريق الهُـدى حـاد
ما عندنا إلا لـه شبـا حـد مصقـول
(الــــدااار)
الدار لا كـدرت صافـي مشاربهـا
مـا قادنـي يمهـا شـف ولا راده
أشـوم عنهـا وأخليهـا وأجنبـهـا
الذيب يبخص مصاديـره وميـراده
العين مـا تبكـي إلا مـن سبايبهـا
الوقـت غـلاب والعربـان نقـاده
سـود الليالـي كثيـراتٍ عجايبهـا
تضحك عيال الخدم وتزعل السـاده
يـا عـل ربـي يعدينـا مصايبهـا
عن ما جرى للعرب ما هيب نشـاده
أحـدٍ يصـدق بهـا وأحـدٍ يكذبهـا
وابن الرخم يحتفل في عيـد ميـلاده
أعـز نفسـي وأعزيهـا وأعاتبهـا
وكثر المجامل ترى ما هوب لي عاده
إن كان نفس الولـد نالـت مطالبهـا
وإلا قعـد مقعـد الحقـران مقعـاده
كـل الخلايـق لهـا ربٍ يحاسبهـا
واللي تمني كثيـر منـاه مـا فـاده
اللي يعمـر بهـا واللـي يخربهـا
واللي يواعـد ولا يصـدق بميعـاده
أرض الله الناس تسعى في مناكبهـا
كـلٍ بفالـه بمحـداره ومسـنـاده
بعض الرجاجيل لو تنتف شواربهـا
إن كان رأسه يخلي الـزود وعنـاده
يمناً تقصر عـن الماجـوب عقبهـا
تستاهل اللـوم دوم الـدوم وزيـاده
(من يشوفكـ ملكته)
قلت من كثر حبك وين أودي غـلاك
رد وإلا قسمته بيـن قلبـي وعينـي
ما دريت إن مالي فالهوى إلا هواك
باسطٍ لك على شرع المحبة يدينـي
ولع الله قلبي واشتقى فـي رضـاك
سالفتنا بحبك بيـن روحـي وبينـي
من يشوفك ملكته بالهوى يـا مـلاك
في عيونك جمالٍ يسحر الناظرينـي
كل باهي جمالٍ مـا يسـاوي بهـاك
عنه بعد الثرى عن مطلع الفرقدينـي
وبارق العاتق اللي في سحابة سماك
شع نورٍ تكسر من علـى وردتينـي
شفت مثل الشفق يوم انتبه من شفاك
بس مال الشفق في غيبتـه شفتينـي
راح عمري وعمري غالي في رجاك
أترجا وصالك بيـن حيـنٍ وحينـي
(غصن الولـــع)
يا سيد الجرح الأول ناظـر الثانـي
لايلحق الجـرح الأول ثـم يتعبنـي
مهما بلغ في هواك وحبـك إيمانـي
والله مـا تلعـب اللعبـة وتكسبنـي
تجرح شعوري وتنشدني عن الجاني
تصور إنـي ولـو أغليـك غالبنـي
أضيق ذرعي بحبي لـك وتحنانـي
قبل أذكر أن الله لعشرتـك واهبنـي
طوع البنان أنت خذني عود ريحاني
وآخذك زهرة غصن والزهر يعجبني
أنا شجر وإنت طيرك حرك أغصاني
تهز غصن الولع والحـب قاضبنـي
من أول الدرب رح وأرجع وتلقاني
وفي أول أوراق دفتر حبك اكتبنـي
ولا تمسح الدمعة الليلة على شانـي
متنـازلٍ قبـل تتكـرم وتطلبـنـي
(عظيـــم أشوااق)
داعي عظيم أشـواق قلبـي ندبنـي
بعيونـه الثنتيـن حـب وكـرامـه
وأطرق وسلهم بالرمـوش وكتبنـي
في صفحة أموات الهوى من غرامه
وقف وناظرنـي وصـد وسلبنـي
من قلبي اللي فيـه مثـل القيامـه
وبسلاح روس رموش سودٍ غلبنـي
عكشٍ تنوش الخد نوشـة سلامـه
وفوق الجياد الصفر غار وكسبنـي
خذني أسيـرٍ فـارسٍ فيـه شامـه
فيه الغلا والملـح والزيـن يبنـي
بنـات حـواء كلهـن فـي بهامـه
هذا الذي حبـه ظمـي وشربنـي
وشرب الهوى ما فيه عيب وملامه
الله لغضـات الصبـايـا وهبـنـي
لكـن هـذا فــارقٍ باحتـرامـه
(إعجــــــــاااب)
يمكن يكون اعجاب واعجاب واعجاب
ويمكن .. ويمكن .. ما عرفت النهايه
بينـي وبينـك بالمحبـة ميـة بـاب
تسعيـن قدامـي وتسعـة ورايــه
والعاشر اللي عن خفا القلب ماغـاب
ايــردده تـرديـد بالـذكـر آيــه
يقين حبي من هوى النفـس مرتـاب
ولا تعلمـت انهـزم فـي هـوايـه
عيني نظرها ف الهوى كل مـا ذاب
أتبع هواي شوي وأقضـب عصايـه
سحر العيون اللي على عِكش الأهداب
وسيلـةٍ حقـق بهـا الشـوق غايـه
كن الرموش أرقام وعيونـك كتـاب
شفـت النهايـه فيـه قبـل البدايـه
(أهل الهـــوى)
إلـى صفالـي زمانـي بـك
فما فوق كل التـراب تـراب
يوم انتشي من نشـا طيبـك
أشوف مجمل عداي اصحاب
وان اشتغل بي خفـا غيبـك
كني ملكت العـرب بكتـاب
أنــا وقلـبـي معازيـبـك
ما دام جرح الغلا ما طـاب
بعيـد واسـعـى بتقريـبـك
أبيـك تستوطـن الالـبـاب
والدمعـه أغلـى مناديـبـك
ما ظن طاحت بدون اسبـاب
كلمـة غـلا فـي مكاتيبـك
مفادهـا ان الهـوى غـلاب
اسهـر بليلـي وأغنـي بـك
اما غلا أو يكـون اعجـاب
واوقف بطولي وهلّـي بـك
قصور الغلا ما عليهـا بـاب
اناظـر العيـن وادري بـك
غايب وتنشـد عـن الغيّـاب
أفخر بحبـك وامـاري بـك
لأهل الهوى ما حسبت حساب
(متولعٍ برضاااكـ)
ما غير أدور ما يسرك ويرضيك
متولع ٍ برضاك ورضـاك كايـد
يا فاتني طالت مسافـة تماديـك
جورك طغا وأنا بيّ الشوق زايد
سر اهتمامي فيك ماهوب خافيك
عَلمك قلبك قبل تقـرا القصايـد
قصايدي نبضات قلـبٍ يناجيـك
متعودٍ من رمش عينـك عوايـد
عوايدٍ عنهـا قبـل عـام ناهيـك
أقول صد إليـن تطفـي الوقايـد
لا تجرح رماح الهدب قلب مغليك
ما به مكان ٍ للجـروح الجدايـد
تعرف غلاك ومقصدك من تعلّيك
تبيني أسلا عـن قريـبٍ ونايـد
(ثامن سبع العجايب)
عليك كـن جـروح قلبـي قرايـب
هذا ولـد عـم ٍ وهـذا ولـد خـال
إن كان بـه ثامـن لسبـع العجايـب
انت الذي بالملح أبـد مالـك امثـال
ما غير أفكر فيك حاضـر وغايـب
وأسولـف بنجـواك وادلـه البـال
تشوفني مـن حـرة الشـوق ذايـب
وما قلت لي عقب البطا كيف الأحوال
أبا آتجـرأ بـس انـا منـك هايـب
وسيّطر عليّ الخوف يا سمح الاقبال
(عيــــد الريــــــااااض)
لاح فجر الرياض بنور يـومٍ جديـد
جعل فيه السعد من عند رب العبـاد
يوم عيد الفطر يا نجد عيـدٍ سعيـد
الرياض لبست فيها الثيـاب الجـداد
وأهدت الورد والحب العميق الأكيد
شيخها اللي لها بالفكر والجهد جـاد
بين مجدٍ جديـد وبيـن مجـدٍ تليـد
حقق الشيخ لأرض العز كل المـراد
الوطن فوق صدر الكون عقدٍ فريـد
واسطته الرياض وشيخهـا بالشـداد
مالها في زمنهـا بالعواصـم نديـد
كل يـوم لمعاليهـا صـروحٍ تشـاد
فوق حد الخيال وفوق وصف القصيد
مجد الأرض العزيزة والأمير الجواد
تاج راسي وبك يفخر جزيل النشيـد
عن مكارمك يقصر وافي الاجتهـاد
جعل عمرك يابو كل الفضايل مديـد
أنت للمدح ماد إلى قصر كـل مـاد
فرحة العيد بوجـودك تعـم وتزيـد
مثل ما عم جودك نازحيـن البـلاد
(دايـــرة الشـــوق)
للبوح فـي دنيـا المحبيـن معنـا
لب القلوب يصافحه قبل الأسمـاع
يا مـا تقدمنـا ويـا مـا رجعنـا
في دايرة شوق لها جمر وشعـاع
في نورها صدق المحبـه جمعنـا
وبنارها عقب النوى صبرنا ضـاع
ما كل من فـارق فراقـه فجعنـا
ولا كل مقبل يمـه القلـب نـزاع
الا انت يـا موقـد فتايـل ولعنـا
بالفاترات اللي على القلـب بتـاع
يامالهن لو امرهـن جـور طعنـا
جور الهوى للمبتلي فيـه مربـاع
يامـا لطعناتـك ضمينـا وجعنـا
يا رمشها اللي فوق الأوجاع شراع
قل للعـواذل مـا سنعكـم سنعنـا
اللي تلومونـه سمعكـم ولاطـاع
(جـرح الـــغــلااا)
يا منتهى حبي وياسي ورجـواي
قلبي عليك من الغلا شـب نـاره
حيره وضيقة بال وقبال وقفـاي
في ليلٍ أبطـا مـا تبيّـن نهـاره
أقول لنجومٍ سرت فيه مسـراي
جرح الغلا منهو ضميني بثـاره
ثارٍ يحقق لـي مرامـي بدنيـاي
مع من كمل زين ومقام ووقـاره
ما بيه يجرح قلب من تعّب خطاي
أبي شعورٍ صدق حبـي شعـاره
مثل الشعور اللي تضمه حنايـاي
نورٍ يزود إن جاد طيفـه وزارة
بين الحنايا ثابتٍ مـا خلفـه راي
مفتاحه الإحساس والـروح داره
صدق الغلا يقصر عنه كل حكّاي
يا زارعه متـى بتقطـف ثمـاره
(قصـــةالحب)
يا هاجسي مـع طيفهـا لا تغامـر
البعد همه جـور والشـوق فتـاك
ما شفتني مع قصة الحـب سامـر
في دفتر احلامي على كيفي أقـراك
يا بهجة ايامي على عمـري آمـر
عسى الاوامر كلهـا مـن فدايـاك
يم الوصل في تالي الوقت ضامـر
اسباب والاسباب ما ظـن تخفـاك
قصر الغلا لك في خفا الروح عامر
حدايقه تزهر بهـا احـلام دنيـاك
زينك لزين اللـي بهالكـون قامـر
كن القمر في حضرتك من رعايـاك
اضف الرموش السود فوق المجامر
والورده اللي حدرهن في طرف فاك
في رمشك الساهي نواهي ووآمـر
تغري اللـي نـور دنيـاه رويـاك
(يــا صاحبي)
ياصاحبي ما بيك تزعل وأنا حي
تفديك روحي والعقل والحبايب
وش الحياة بلاك يامصدر الضي
يافرحة الايام حاضر و غايـب
دونك حياتي ما تساوي ولاشـي
يا ثامن بالطيب سبع العجايـب
حياة خلق الله على طاهر المـي
يا ماء المروه والمحبه وهايـب
(مبـــدا الشرف)
هاجوس قلبي كل ما قلـت ولا
جاني يدق القاع من غير سبـه
ان كان ما هليـت بالهـم هـلا
وما قول غير الله ربـي وربـه
ما غير بالصبر الجميل آتحـلا
عسى السعد هبّات حظي تهبـه
عن حاجبي صلف النظر ما تعلا
أجمع حطب هم الليالي واشبـه
مبدا وعن مبدا الشرف ما تخلا
الهون طبع نفوسنـا مـا تحبـه
استعرض الأحداث دق ٍ وجـلا
والجرح في كف المقادير طبـه
الهم في روض القناعـات فـلا
وذبّل زهر روض ٍ مريفٍ وخبه
عليّ عذبـات المشـارب تغـلا
والما الحلو بكفوف غيري تصبه
دنيـاً بتفريـق الخلايـق تجـلا
إلا امتلى كاس المسـره تكبـه
يا شارب أيام الفـرح لا تعـلا
احسب حساب المقبلات وتنبـه
بالشاردات من القصيـد آتسـلا
أقضب خفا بيـتٍ وبيـتٍ أذبـه
(أنت الحبيــب)
أشرق سنا شمس الغلا عقب تغريب
وطاب الزمان وطاب جرحٍ عطيبـي
ألفٍ هلا.. وألفٍ غلا.. وألف ترحيب
مع كثرها لـك بالغـلا يـا حبيبـي
لوّي مريضٍ كل مـا شفتـك أطيـب
يوم انك لوجـدان روحـي قريبـي
انت الحبيب اللي منزّه عـن العيـب
وانت الذي تقرا مـن الهـم غيبـي
ما ودي إني عنـك يالغالـي أغيـب
وما ودي انك عن عيونـي تغيبـي
يا عيوني الثنتيـن هاتـي وباجيـب
لك بالهوى والحـب حـقٍ مصيبـي
بينـي وبينـك بالغـرام المناديـب
سودٍ هواها مـن نظرهـا غريبـي
وصارت لي أفراح الليالي معازيـب
وغابت هجوس الهاجس اللي مريبي
(الـــورد)
مظاليم رمشك وردتين علـى الخديـن
غضبها حمارٍ ظاغي الزين راقت بـه
سنا نور ولا نار مابيـن بيـن وبيـن
طغى زايد الحشمه من الزين ضاقت به
تكسر عليها العطف بالسلهمـه والليـن
نضارة جمال يفتن الشوق شاقـت بـه
رموش تطلق من سحابة سواد العيـن
على عرشها بين أجمل الورد ماقت به
عليها كتب برموشه الحانيـه حرفيـن
وذبحني بسيف اطراف عكش تلاقت به
هدايا عيونك كل ما شفتهـا جرحيـن
خفا سر روحي كنه اليوم فاقـت بـه
(الله يـــرعــــاااكـ)
أصيح مـن فرقـاك وانتـه قبالـي
وشلـون لا منّـي توادعـت ويـاك
طيفـك ينادمنـي بسـود الليـالـي
حبك صبغ في مهجة القلب ذكـراك
ألقـاك دايـم ماثـلٍ فـي خيالـي
تغيب عنـي والتفـت فيـه والقـاك
مـرٍ تعاتبنـي بـحـبٍ مضـالـي
ومرٍ توسدني مـن الحـب يمنـاك
نـذرٍ علـيّ انـك عزيـزٍ وغالـي
وما فيه أحد عندي من البيض يسواك
اعظم جمال الخلـق بـأول وتالـي
امصوره رب المـلا فـي محيّـاك
امفضلـك ربـي عزيـز الجلالـي
وزودٍ على هذا ترى الزين يزهـاك
والكلمـه اللـي قلتهـا ردهـا لـي
معنى السعادة بالغلا غاية ارضـاك
من حب غيرك قصر الأشواق خالي
اسكن بقصر الحب واسعـد بدنيـاك
توافق ٍ بك حسـن خلـق ودلالـي
ولا بقـا إلا قـولـة الله يـرعـاك
للأمسيـــــــــه بقيـــه
مـــــودتــــي
الإهداءات
الأمسيـــه الخامســـه لشــاعر(( الســـــامـــر))....
العرض العادي
